1. Incumbensas

Per midar il svilup da la part sura da la Surselva cun meglierar la cuntanschibladad han las vischnancas da Tujetsch, da Mustér e da Medel (Lucmagn) laschà far in studi d'opportunitad che eruescha variantas pussaivlas per in tunnel da via u da viafier tranter Sedrun e Göschenen e che duai mussar las schanzas da realisaziun,la rentabilitad sco er il potenzial economic da quellas. Al cumenzament duain ils meds da transport (viafier u via) restar averts. Els duain vegnir evaluads en il decurs dal studi.

En il rapport dal studi duain vegnir preschentads ils resultats da la survista da projects pussaivels e fatg in giudicament general. Il rapport duai servir sco basa per la decisiun da las incumbensadras, sche e sche gea, tge variantas che duain vegnir elavuradas detagliadamain e valitadas. Il rapport vegn a cuntegnair ils resultats necessaris e las infurmaziuns necessarias sco er ina recumandaziun a las incumbensadras per l'ulteriur proceder.

2. Finamira

Sco che analisas empiricas precedentas mussan, reducescha ina meglra cuntanschibladad da las regiuns alpinas per part er la valurisaziun en questas regiuns, sch'ellas n'han betg ina fitg buna qualitad da dimora. Sche quella manca, sa midan dimorantas e dimorants durant l'emna en giasts dal di u ils giasts svaneschan dal tuttafatg, perquai che la quietezza e la recreaziun pateschan da la meglra cuntanschibladad. Ultra da quai mussan las retschertgas davart las novas colliaziuns da traffic en il Grischun, ch'il niz per l'economia e per il traffic giustifitgeschan darar las investiziuns spetgadas. Las enconuschientschas correspundentas vegnan er integradas en ils singuls pass da lavur ed i vegn renvià a premissas, per ch'in tunnel possia avair effects positivs per la regiun.

Ils singuls pass dal studi vegnan descrits en chapitels correspundents dal rapport e resultan sco suonda: 

• L'emprim vegnan eruids e concretisads ils basegns da la regiun (cf. chapitel 2).
• Sin basa da quai vegnan sviluppads projects, stimada lur realisabladad e calculads ils custs d'investiziun (cf. chapitel 3).
• Suenter vegnan analisads ils effects dals projects per il traffic (cf. chapitel 4.1) sco er per la valurisaziun regiunala (cf. chapitel 4.2).
• Parallelamain cun l'analisa dals effects vegnan preschentadas las cundiziuns generalas naziunalas e chantunalas. Quellas servan cunzunt per stimar, sch'il tunnel correspunda als princips da la confederaziun areguard l'extensiun da las vias da traffic.
• Ils effects e las cundiziuns generalas furman la basa per il giudicament general dals projects (cf. chapitel 6).

Il rapport terminescha cun ina recumandaziun a las incumbensadras per l'ulteriur proceder.